TEMBO WAKATIZA KATIKA MAKAZI YA WATU NA KUJERUHI MMOJA WILAYANI MPWAPWA

Posted on: December 5th, 2017

Kundi la tembo wapatao 20 wamekatiza katika makazi ya watu na kujeruhi mkaazi mmoja aliyejulikana kwa jina la Japhet Lechipya (28) wa kijiji cha Idilo katika kata ta Mazae. Tukio hilo limetokea kufuatia  jaribio la mjeruhiwa kujaribu kuwapiga picha tembo hao waliokuwa wanapita katika makazi hayo.inasadikika kuwa tembo hao wametokea katika mbuga za mikumi.Mwenyekiti wa kamati ya Ulinzi na usalama Mhe. Jabir shekimwer amelielezea tukio hilo kuwa tembo hao wametokea katika wilaya ya jirani ya Chamwino na inasadikika kuwa wametoroka kutoka mbuga ya Mikumi. Aidha Mhe.Shekimwer ametoa wito kwa wananchi kuacha kuwasogelea Tembo hao na kuwachokoza ili kuepuka madhara kwakuwa wanyama hao hawapendi kelele.

Daktari wa Wilaya ya Mpwapwa Dr. Said Mawji amethibitisha kuwepo kwa tukio hilo ambapo amekiri kumpokea mgonjwa mmoja ambaye alijeruhiwa vibaya lakini kwa kushirikiana na madaktari waliopo wameweza kumtibu majeruhii huyo na hali yake inaendelea vizuri.