Halmashauri zatakiwa kuwa na Mwongozo wa Kushughulikia Malalamiko

Posted on: September 12th, 2017

Halmashauri ya Wilaya ya Mpwapwa imeagizwa kuandaa Mwongozo wa kushughulikia Malalamiko mbali mbali ya wananchi ili iweze kutambua changamoto mbali mbali za wananchi na kuzishughulikia kikamilifu. Hayo yamesisitizwa na Mratibu wa  Utawala wa Utumishi wa Umma- IKULU,  Francis Mang'ira  katika Kikao kazi cha Kukumbushana Wajibu na Watumishi wa Halmashauri ya Wilaya ya Mpwapwa Leo tarehe 12.09.2017 katika Ukumbi wa Halmashauri. Mang'ira Amesema kuwa Pamoja na kuwa na Mwongozo wa jumla wa kushughulikia Malalamiko, kila Halmashauri inapaswa kuandaa Mwongozo wake wa kushughulikia Malalamiko utakaoendana na Mazingira yake halisi.

 Sanjari na hilo ametaka kuwepo na Bango linaloelekeza zilipo ofisi za Dawati la Malalamiko na ametoa wito wa kuwepo kwa ushirikiano baina ya Dawati la Malalamiko, Wakuu wa Idara pamoja na Kamati za Uadilifu. Katika kupunguza Malalamiko Watumishi wa Umma wameaswa kuwajibika ipasavyo na msisitizo mkubwa uwe katika kufanyika kwa Mikutano na vikao vya Kisheria vya  Watumishi Vijiji na Halmashauri. Vile vile Watumishi wameaswa kuyatambua majukumu yao na kuyatekeleza kikamilifu kwa kuzingatia Sheria, Taratibu , Kanuni Miongozo na Nyaraka mbali mbali kama alivyosisitiza Mratibu Msaidizi wa  Utawala wa Utumishi wa Umma- IKULU, Abdallah Said Mwongane.